Raak Betrokke

Dankbaarheid is die kern Bybelse motivering vir die gee van dankoffers en liefdegawes:

• dankbaarheid teenoor die Here vir sy genade
  • omdat ons, verlore sondaars, deur Jesus Christus hemelse rykdom (saligheid) ontvang het (2 Kor.8:9);
  • omdat alles wat ons is en het aan die Here behoort en Hy vir ons sy gawes gee om te gebruik (Ps.24:1; Pred.5:17-18)
• kerklike bydraes is ʼn offer van dankbaarheid om Hom mee te dien (2 Kor.9:13a). Dis hoe die Bybel oor geldelike bydraes praat (2 Kor.9:5b).

Dankoffers word aangewend in diens van die koninkryk van die Here, nl:

• vir die voortgang van die prediking van die Evangelie en die sigbaar maak van sy verlossende genade aan mense
  • deur predikante in staat te stel om voltyds die Evangelie te verkondig tot opbou van ons gemeente (Lukas 10:7; 1 Timoteus 5:18; 1 Korintiërs 9:3-18)
  • deur die uitgawes van die gemeente te finansier
  • deur sendelinge reg deur die wêreld in staat te stel om die Goeie Nuus te versprei (2 Kor.8:1-7)
• vir die sigbaar maak van die Here se liefdevolle heerskappy aan kerke/ (geloofs)gemeenskappe buite Die Bult
  • deur instansies in die gemeenskap of medegelowiges buite my geloofsfamilie te ondersteun (2 Tessalonisense 3:13; Galasiërs. 6:10; Handelinge 20:35).
  • deur ramings wat aan die kerkverband betaal word om bv. die versorging van afgetrede predikante, opleiding van predikante, versorging van kinder- en ouetehuise, asook die spesiale onderrig vir gestremde persone moontlik te maak. Die ramings beloop ongeveer R1430 per belydende lidmaat/jaar.

Liefdegawes word aangewend in die Christelike liefdesdiens, nl:

• onder leiding van die diakens sorg ons vir mekaar
  • sodat niemand weens armoede, eensaamheid, ouderdom, siekte of om ander redes van ons vervreem raak nie.
• Onder leiding van die diakens sorg ons vir ander
  • sodat ook ander mense wat in nood verkeer die liefde van Christus kan beleef.

In beide die Ou as die Nuwe Testament is die gesindheid waarmee mense dinge doen belangrik.

In 2 Kor 9 leer die Here dat hy offers uit dankbaarheid wil hê, vrywillige offers en nie offers wat afgedwing word nie.  God het die blymoedige gewer lief (2 Kor.9:7, Eks.35:5)

’n Ander belangrike konsep in die Bybel is die EERSTELING-GAWE.  Dit was in die tyd van die Ou Testament die gebruik om die eerste van die oes na die tempel van die Here te bring (Eks.13:11,12, Spr.3:9).   In die eersteling is eintlik die hele oes verteenwoordig.  Wie dus die eerste en beste vir die Here bring sê daarmee dat hy besef dat alles aan die Here behoort.

In die Ou Testament was die gee van ‘n tiende ‘n duidelike voorskrif, bv. Lev.27:30-32 en (Gen.14:17-20). 

In die Nuwe Testament word daar heelwat minder gemaak van die gee van ’n tiende.  Nêrens word die gebruik pertinent gehandhaaf of veroordeel as ’n opdrag van die Here nie.  Daar is wel aanduidings dat die Here dit nie afwys soos wat Hy van die Outestamentiese wette afwys nie. 

In die opdrag om onsself as lewende offers vir die Here te gee (Rom.12:1) vind ons die beginsel  dat nie net ’n deel van ons(ook van ons inkomste) aan die Here behoort nie, maar dat ons volkome aan die Here behoort. Ons behoort dus onsself en ook al ons besittings en inkomste te gebruik as offer aan die Here.

Teen hierdie agtergrond is die kerkraad se riglyn vir dankoffers:

• 5% van netto inkomste per maand.
• Studente: geskatte ramings (R140 per maand) + R250 per maand = R390 per maand